ختي العزيزة.. لو ربنا فك عقدتك.. واتخطبتي..
فإليك نصائحي عشان تعدى بخطيبك من مركب الخطوبة إلِّي محدش عارف هاترسى على
إيه.. إلى مثوااااه الأخير في قفص النسانيس.. قصدي قفص الزوجية السعيد..
أجمل ما في الخطوبة العزومات الرومانسية .. على أحلى محلات أكل فى البلد..
واللي عمرك ماهاتشويفها بعد الجواز.. المهم نصائحي لك عند أي عزومة مع
خطيبك.. لازم تظهرى قدامه بمظهر البنت الرقيقه وانا طبعا متأكد طبعا انك مش
رقيقه بس عادى ....
الأول لازم تعرفي إن الشوكة والسكينة بيتمسكوا من إيديهم من الطرف يعني مش من الوسط ولا م البوز زي الخنجر ولا من فوق طبعًااا -
العيش أوعي تفضحينا وتقطعيه بسنانك.. ولا الرغيف نصين بأيدك وكل نص لقمة وتحشري.. أوعي...العيش بيتقطع بالسكينة فى الطبق.
وبعدين تاخدي لقمة.. لقمة.. بالعافية.. قال يعني نفسك مسدودة.. اضغطي على
أعصابك جدااا وبعدين لما تروَحي.. إبقي حِفِّي زي مانتىِ عايزه... .
الشوووربة.. أبوس كعب رجلك
..
بند الشوربة ده مهم جدًاااا.. الشوربة تتشرب من غير صوت خالص. . ومن غير
ماتقعدي تنفخي فيها.. زي القهوجي اللي بينفخ فى الحجر للزبون.. وطبعــاً
عايزك تنسى خالص.. السلطانية اللي بتقيميها على بقك فى البيت.. وتدلدقي على
روحك..
بالمعلقه وبدون صوت.. سخنة ولعة برضه بدون صوت.. وتسيبي تلت الطبق ع الأقل.. مش تميليه.. عشان تلهطيها لآخر نقطة.....
الرز طبعاً .. بيتاكل بالشوكة.. أوعي إيدك تتمد ع المعلقة. . وتغرفي من طبق
الرز وتعبي.. إوعي.. الرز بالشوكة.. وكأنك بتبوسيه مش بتاكليه..
المكرونة.. الاسباكتي.. برضه بالشوكة.. تتلف على طرف الشوكة.. لحد ما تخلص
وبعدين تحطيها فى بؤك من سكات.. مش تشفطي المكرونة عود عود..
السمك.. مشكلة.. شوفي.. بتفصلي اللحم عن الشوك.. إزاي..؟؟ تقطعي اللحم من
النص.. بالطول وبعدين تفردي اللحم على الجانبين ولما تخلصي ناحية.. متقلبيش
السمكة.. بلاش فلح.. شيلي السلسلة بالشوكة والسكينة وحطيها فى جنب الطبق
وكملي أكل النص التاني.. وبدل الفيلم الهندي ده.. نصيحة.. ماتكليش السمك
خالص..
قولي مابحبش السمك وخلصي نفسك عشان الفضايح ربنه يسترها عليكى ..
الجمبري.. -إذا كنتي عارفاه وانا متأكد انك مش عارفاه-.. أول ماطبق الجمبري
ينزل.. بصيله بقرف واحتقار شديد.. قال يعني زهقانة من كتر أكل الجمبري
الجامبرى فى بيت بابـا.. وأتنهدي جامد وقولي.. برضه جمبرى تانى..؟؟؟ وتروحي
قاطعة راس الجمبريياية.. بالشوكة.. أنا فى عرضك إنسي المصمصة دلوقتى انتى
مش فى البيت..
البطاطس سواء مسلوقة أو محمرة.. أوعي تهرسيها وتدبيها على الرز وتدي
...لا..لآ...لآ...بالشوكة حتة حتة وإنتى زي ما تكوني هاتعيطي من كتر ما
البطاطس صعبانة عليكي..
الفاكهة.. لو الفاكهة فيها بذر.. طلعيه من بؤك بالراحة وحطيه فى إيدك وهي
مقفولة.. وبعدين فى طفاية السجاير اللي على الترابيزه.. أوعي ياحبيبتي من
نظام التفتفة للبذر.. إنسي....
ولما تخلصي أكل تحطي إيدك على بطنك.. -اللي عصافيرها بتصوصو من العينات
اللي كلتيها-.. وتقولي له مش ممكن.. أنا عمري ما اتفجعت كدة.. أنا قدامى
أسبوع.. هابطل أكل فيه.....
وبعدين تمسكي الفوطة اللي دايمًا موجودة على التربيزة من غير لازمة.. وتبوسيها..
آل يعني بتمسحي بؤك..
وبعدين تستأذني من الشخص المخدوع فيكى ده عشان تدخلى التوليت عشان تصلحى
الالوان اللى على وشك.. وتخشي التواليت وتطلعي من شنطة إيديك.. لفة الفول
والطعمية اللي جايباها معاكي.. وبالهنا والشفـــا
وربنه يوفقك فى انك تمصى دمه اصدى فلوسه فى فترة الخطوبه وحاولى دايما
تكونى رقيقه على عكس طبيعتك طبعا وتحسسيه انك بتخافى عليه وعلى فلوسه