مين قال ان الي فات مات؟؟

مين قال ان الي فات مات؟؟
دي قصه جامده جدا وعجبتني اوي ويارب تعجبكم نقرتين لعرض الصورة في صفحة مستقلة نقرتين لعرض الصورة في صفحة مستقلة


وهقدمها علي حلقات


هي طويله شويه بس بجد حلوه


..منقوله من احد المواقع الالكترونيه..



اتمنى ان تستمتعوا بها
تحياتينقرتين لعرض الصورة في صفحة مستقلة

الحلقه 11



ندى: انا عايزة اجيلكو الكلية مرة.
شادي: منا قلتلك الخميس الي فات تعالي مع هالة, انتي الي مرضتيش.
ندى: والله كان عندي امتحان بيولوجي في الدرس, مكانش ينفع اجي.
شادي: طيب ابقى تعالي مع هالة بقى, حتى اعرفك على سامح صاحبي, دا هيموت ويشوفك.
قالت بلهجة ذات مغزى.
ندى: وتعرفني على ريكا ولومي بالمرة.
شادي: يا بنتي هحلفلك للمرة الالف انهما اصحابي عادي في الشلة, طب دانا اقل واحد عنده اصحاب بنات في شلته , وريهام وسلمى دول بنات محترمة جدا, لما تيجي والله لعرفك عليهم وانتي هتشوفي بنفسك.
وفكر " وهو انا اقدر اصاحب بنات كتير , دي ماما كانت فضحتني".
ندى: اشمعني انا ماليش اصحاب ولاد؟.
شادي: ومين قال ان ممكن يكونلك اصحاب ولاد اصلا؟, هو انا شوال جوافة مثلا؟.
ندى: شفت , شفت انت بتتعصب ازاي لما بجيب السيرة, لكن انا ماليش حق اغير او ازعل.
شادي: لا يا ماما , انتي حاجة وانا حاجة, انتي بنت, وبعدين هو انا مش مكفيكي ولا ايه؟.
ندى: يعني هو انا مش مكفياك؟.
شادي: انتي بتستعيلي معايا كتير وبتتغابي في حاجات هايفة, اسألي اختك يا ستي , انا لو ليا صحاب غير ريكا ولومي , ابقي تعالي كلميني.
تراجعت ندى امام غضبه , وقالت بدلال.
ندى: منا عارفة يا حبيبي والله, بس انا بحب اغير عليك , بلاش يعني؟.
شادي: لا ياندى, انتي كده مش بتغيري انتي كده بتخنقيني.
ندى: انا بخنقك عشان بحبك؟.
شادي: متبقيش شكاكة كده على طول , انا مش مضطر اكدب عليكي اصلا.
ندى: انا شكاكة؟, طب دانا سايباك على راحتك جدا, انت مشفتش البنات بيعملو ايه مع الي بيحبوهم.
شادي: بقلك ايه يا ندى, انا اصلا مش فاضي وطالع عيني في ام المشروع الي بشتغل فيه دا, روحي , روحي ذاكري عشان معطلكيش.
ندى: استنى يا شادي مش كل ما اكلمك تقفش عليا كده, فيه ايه الي حصل يعني؟.
شادي: مانا كل ما اكلمك الاقيكي بتخنقي فيا وانا مش طالبة معايا خنقة يا ندى النهاردة.
ندى: منا الي كل ما اكلمك الاقيك مشغول في حاجة , مشروع او كورس اوعندك كويز او اي مصيبة تانية, اعمل ايه يعني؟, مانا عارفة الي فيها , ماهالة اهي زيها زيك ومش مشغولة الشغلة الي انت فيها دي يعني.
شادي: والله مش مشكلتي ان اختك بتحب تزنق نفسها على اخر وقت .
ندى: يا سلام وانت بقى الي داخل من اولها معيد في الكلية.
شادي: بصي يا ندى, انا ورايا سهر للصبح على المشروع, روحي اقرفي في حد غيري لو سمحتي.
ندى: استنى هنا يا شادي ,انت هتقفل وتسيبني كده وانت مزعلني.
شادي: اللهم طولك يا روح, عايزة ايه؟, انتي عايزة ايه دلوقتي؟, والله العظيم عندي شغل, وانتي كمان عندك مذاكرة, روحي ذاكري يا ندى وبكرة نتكلم.
ندى: لا مش هروح, ومش هذاكر, الا لما تصالحني وتضحك وتقولي انك بتحبني كمان.
شادي: والله انا مافايق يا ندى خالص.
ندى: وانا مش هسيبك تقفل وانت زعلان مني.
قال باقتضاب.
شادي: حاضر يا ندى, انتي عارفة ان انا بحبك, متزعليش مني, معلش.
ندى: واضحك بقى.
شادي: حاضر اهه, هههه, حلو كده, يلا بقى عشان ماما متقمش تلاقيني بتكلم في التليفون.
ندى: ماشي يا حبيبي, فكر فيا وانت بتشتغل, ماشي؟.
شادي: حاضر.
ندى: وانا قبل مانام هرن عليك.
شادي: طيب يا حبيبتي.
ندى: باي.
شادي: مع السلامة.
**************************
سامح: بس انتي مش زي ما كنت متخيلك خالص.
ندى: كنت متخيلني ازاي يعني؟.
سامح: يعني , مش مهم المهم ان انتي غير .
ندى: احسن ولا اوحش يعني؟.
ضحك قائلا.
سامح: لا متخافيش احسن.
شادي: اديكي شفتي يا ستي سامح الي ليل نهار تسمعي عنه, توأم روحي زي ما بتقولي.
ندى: امال فين ريكا ولومي؟.
اقبلت عليها فتاة جميلة مبتسمة , محجبة , وتوقفت امامها تنظر في فضول, وقالت برقة.
سلمى: ندى؟.
قالت ندى في حرج.
ندى: ايوة.
سلمت عليها الفتاة بحرارة.
سلمى: انا سلمى زميلة شادي, انا سمعت عنك كتير اوي, من شادي ومن هالة كمان.
قالت ندى من بين اسنانها.
ندى: وانا كمان, انتي لومي صح؟.
سلمي: ايوة انا, وريكا جاية في الطريق, انتي قاعدة معانا النهاردة صح؟, اكيد هتشوفيها.
شعرت ندى ببعض الود للفتاة, فقالت.
ندى: انتي عسولة اوي.
ضحكت سلمى برقة تضايقت لها ندى,وهي تقول.
ندى: وانتي فعلا زي ما بيقولو عنك الي في قلبك على لسانك, انتي الي عسولة يا حبيبة قلبي.
سامح: تعالي يا لومي نروح نشوف العيال داخلين المحاضرة ولا لأ؟, انت طبعا مش معانا النهاردة يا شود.
شادي: على عيني يا موحا انت عارف, بس ابقى انت ظبطني وفهمني الي الراجل قاله.
سامح: ولا يهمك, واكتبلك اسمك في الغياب كمان لو حبيت.
وتركاهما وانصرفا.
شادي: انتي عارفة ان دي اول مرة اطنش محاضرة.
ندى: اخص عليا , كده انا مفشلاك.
شادي: ولا يهمك, ايه رأيك في لومي, عسل صح؟, ومحترمة اوي.
ندى: اه شكلها لذيذ.
شادي: هتشوفي ريكا بقى, شفتي لومي حلوة وهادية ازاي, اهي ريكا دي حاجة تانية خالص, وشعنونة ولا الصبيان.
اقبلت في هذه اللحظة ريهام, فتاة سمراء , مع ملامح رقيقة عادية, ولكن صوتها عال,قالت من بعيد وهي تقترب.
ريهام: الواد شادي واقف برة ليه؟, مش فيه محاضرة دلوقتي؟, طب انا وضايعة وعارفين, انت يا دحيح واقف هنا ليه؟.
تلفت شادي حوله وهو يقول.
شادي: اخرسي, صوتك عالي الله يحرقك , مش هتبطلي الفضايح دي؟.
ريهام: ومين الي معاك دي؟.
شادي: بس يا بنتي وطي صوتك دا؟.
اقتربت وسلمت على ندى وكأنها تعرفها منذ زمن.
ريهام: اكيد ندى, عرفتك من صورتك الي معاه, انا ريكا.
سلمت عليها ندى بحذر وهي تتمتم.
ندى: الحمد لله.
ريهام: هو محدش قدر عليه غيرك, اهو الواد دا عمره ما فوت محاضرة, وعلى طول الاول في المشاريع, انا بحقد عليه.
قال شادي بغيظ.
شادي: الله اكبر.
ريهام: شفتي وكمان بيخاف م الحسد, واقفة ليه تعالي نعد.
واخذتها من يدها وكأنها صديقتها , وجلستا في الكافيتيريا وتبعهما شادي, وقضت الوقت معهما الى ان انتهت المحاضرة وجاءت اختها وصديقاتها, وكذلك اصدقاء شادي, وشعرت ندى بجمال حياة الجامعة , وكذلك شعرت بالخطر على شادي.
********************
ندى: معرفش يا نسمة, يعني سامح وشادي, واحمد مأمون و على واحمد فوزي, اربع ولاد , وسلمي وريهام دول بنتين, بس تحسي اعدادي كلهم اصحاب في بعض, يعني هما برضة اصحاب شلة هالة, هبة وهدير وخيري , وايمن وعلاء, واحمد السباعي ومعتز, واحمد عزت و....
قطعتها نسمة.
نسمة: الله الله, انتي شلة اختك كلها صبيان ولا ايه؟.
ندى: يعني بس عيال زي العسل, بس شادي الغلس مسابنيش اعد معاهم, زعقلي عشان بهذر مع ايمن , قالي الواد دا متهذريش معاه تاني, مش كويس.
نسمة: ممممم, وايه كمان؟.
ندى: انتي بتتريأي ولا ايه؟.
نسمة: انا بسمع , يعني رحتي اتبسطتي يعني.
ندى: انتي مالك يا نسمة مبتحبيش احكيلك ليه؟.
نسمة: عشان انتي مش حاسة انك بتغلطي اصلا, يعني صاحبتي شادي ورحتي معاه الجامعة كأن عادي جدا انك تصاحبي ولد, يا حبيبة قلبي مش عشان هالة عاملة كده يبقى ليكي الحق انك تعملي كده ,وبعدين برضة مش عشان ماما عارفة يبقى انتي صح, انا مش عارفة ماما دي سيباكو كده ازاي؟, وموافقة عادي انك تدوري مع شادي, واختك تدور مع عمرو.
ندى: ماما؟, دي ماما دي عسل, امال عايزاها تبقى زي مامة شادي, عاملالنا حصار على طول.
نسمة: انا مش عارفة ازاي هي ساكتة عليكو اصلا, مش كده انها تكون صاحبتكو , مش كده , كده غلط.
ندى: انتي الي عبيطة ومش عارفة تصاحبيها, يا بنتي ماما مش هتعملك حاجة قربي منها واحكيلها.
نسمة: احكيلها ايه يا بنتي , الام ام برضة, مينفعش تكون صاحبة, انا عندي اصحاب, محتاجة امي تكون ام مش صاحبة هي كمان, تنصحني وتمنعني اقع في الغلط, مش تسيبني كده على راحتي.
ندى: يعني انتي عايزة ماما مثلا تضربني عشان بكلم شادي؟.
نسمة: لا , بس على الاقل تاخد منك موقف, او تفهمك ان دا غلط.
ندى: بس شادي مؤدب, وعارفينه عشان كده هي مطمنة, وبعدين انا بحبه اوي يا نسمة, ماما عشان كده سيباني.
عادت نسمة تدفن رأسها في مذكرة الرياضيات, وهي تتمتم.
نسمة: بحبه اوي, والتانية بتحبه اوي, وعارفينه, وكلكو واقعين في مصيبة وانتو ولا داريين.
ندى: انتي بس الي معقدة, خليكي كده, مش هتلاقي برص يبصلك.
نسمة: انا مش فاضية حد يبصلي , ومش عايزة حد يبصلي, انا عايزة اذاكر وانجح, واعيش حياتي صح, كل حاجة في وقتها, مسبقش الاحداث واخد حاجة مش من حقي؟.
ندى: حاجة مش من حقك؟؟.
نسمة: اه, اني احب واحد وانا لسه مش باين هاخده ولا لأ, يبقى انا جيت على حق واحدة تانية ممكن تكون مراته, وانا جيت على حق واحد تاني ممكن يكون جوزي في يوم من الايام.
ندى: لااااااا, دانتي خنكة خالص.
نسمة: ربنا يهديكي انتي يا ندى, انتي لسه في الاول وممكن ترجعي في الي عملتيه, هالة انا فاقدة فيها الامل اصلا, بس انتي مسيرك تعرفي ان انا صح.

[center] [b]الحلقه الثالثه عشر[/b]
اغلقت سلمى الهاتف ونظرت الى ريهام الجالسة امامها في الكافيه بصمت, فقالت ريهام بدهشة.
ريهام: كانت عايزة ايه؟.
وضعت سلمى الهاتف على المنضدة امامها وهي تتنهد, قبل ان ترفع كأس المشروب وترتشف منه , ثم قالت.
سلمى: اصلهم متخانقين, وكانت متصلة بيا عشان اصالحهم على بعض.
ريهام: وملقتش الا انتي الي تكلمك.
اعاد الكأس ببطء وهي مأخوذة.
سلمى: شفتي بقى الحظ, عادي يا بنتي انا متعودة على كدة, هو اصلا طول اليوم مبيحكيش الا عليها.

ريهام: بصراحة يا لومي الي بتعمليه ده اكبر غلط, انا خايفة عليكي, ازاي
تكوني بتحبيه وعاملة فيها انتيمته, طبعا هيحكيلك على صاحبته على طول.
سلمى: انا معنديش مشكلة انه يحكيلي, بس مكنتش متخيلة انها ممكن تخليني اصلح ما بينهم.
ريهام: انتي الي عملتي دا في نفسك, بتعذبي نفسك يا لومي.
تنهدت سلمى وترقرقت الدموع في عينيها بأسى.
سلمى: مفيش في ايدي حاجة تانية.

ريهام: لا فيه , يا تبعدي عنه, يا تعرفيه, ماهو مينفعش كده, انا مش فاهمة
انتي مستنية مثلا يشم على ضهر ايده ويعرف انك بتحبيه؟, الولد مش واخد باله
اصلا, ولو اخد باله هيعملك ايه, مانتي عارفة انه بيحب واحدة تانية, ابعدي
عنه لحسن تتعلقي بيه اكتر.

سلمى: ريكا , بالله عليكي تسكتي , يعني انتي فاكرة اني مش عارفة الكلام دا
كله؟, انا عارفاه, بس اعمل ايه؟ , مش في ايدي حاجة, والله ما في ايدي
حاجة, انا غصب عني لقيتني بتشدله وبحبه, حتى وانا عارفة انه بيعاملني
كصاحبه مش اكتر, ومش قادرة غير اني اقرب منه اكتر.
نظرت اليها ريهام في شفقة.
ريهام: ربنا يستر عليكي يا لومي, انا بجد مش مستريحة للي بيحصل دا.
تنهدت سلمى للمرة الثالثة, واشاحت بوجهها عن ريهام وهي تفكر فيما قالته لها بحزن.
***********************
شادي: الو ياندى, فيه ايه؟, قالبة الدنيا وبعتالي ميت مرسال ليه؟.
ندى: انت كنت قافل موبايلك ليه؟.
شادي: كنت بشتغل , ومكنتش عايز ازعاج, ايه الي حصل يعني؟.
ندى: امال مامتك قالتلي انك نايم يعني.
قال شادي بانزعاج.
شادي: وانتي كلمتي ماما فين؟.
ردت ندى بحذر.
ندى: لما لقيت موبايلك مقفول, اتكلمت على البيت.
غضب شادي.

شادي: انتي ايه الي خلاكي تعملي كده؟, وانا اقول مالها قالبة عليا ليه؟,
ربنا يسامحك يا شيخة انا كده مش هخلص, انا مش مفهمك انك متكلمنيش على
البيت.

ندى: انت بتزعقلي انا ليه؟, انت الي كنت قافل موبايلك, انا غلطانة اني
بعمل المستحيل عشان اكلمك ومسيبكش زعلان, مع انك انت الي غلطان فيا.
وضع كفه على وجهه.
شادي: يا اللــــــه,تقومي تكلمي ماما يا ندى.
بدأت ندى في البكاء.
ندى: يعني انا كنت اعمل ايه؟, كنت عايزة اكلمك بأي طريقة, وهي كمان ماقالتلكش اني اتصلت.
صمت شادي لحظات ليهدأ, ثم قال.
شادي: خلاص ياندى متعيطيش, ومتزعليش انا اسف, بس بعد كدة متكلمنيش على البيت تاني الا اذا كان فيه حاجة ضروري اوي.
تنهنهت ندى وهي تقول.
ندى: حاضر.
فصمت قليلا ثم قال.
شادي: ايه الي خلاكي تكلمي سلمى؟.
ندى: اعمل ايه يعني؟, منا كنت زعلانة اوي ومعرفتش انام ولا اكل ولا اذاكر امبارح خالص.
شادي: انتي عندك امتحان النهاردة في الدرس صح؟.
ندى: يعني فاكر اهه.
شادي: انا مبنساكيش اصلا يا حبيبتي.
ندى: امال عملت فيا كده ليه؟, وسبتني امبارح اخبط دماغي في الحيطة.

شادي: انا كنت متنرفز منك شوية , فبلاش كنا نتكلم وانا زعلان, قلت نسيب
بعض نهدى حبة, ونبقى نتكلم, بس مكنتش عارف انك مجنونة وهتقلبي عليا الدنيا.
ندى: مانت واخدني مجنونة, انا مكنتش قلتلك ان انا عاقلة.
شادي: خلاص يا حبيبتي متزعليش وقومي ذاكري شوية قبل الدرس.
ندى: ماخلاص , مش فارقة بقى, كان زماني ذاكرت امبارح.
شادي: لا يا نيدو يا روح قلبي لازم تذاكي, انتي شاطرة وانا عارف هتلحقي تذاكري, قومي يلا.
ندى: حاضر.
شادي: بحبك يا مجنونة.
ندى: وانا كمان يا دودو , اوعى تقفل موبايلك تاني, وتعذبني عليك كدا تاني.
شادي: حاضر يا حبيبتي, يلا سلام.
ندى: باي.
واغلق الهاتف والتفت فنظرت اليه سلمى وهي تقول بلهفة هادئة.
سلمى: ايه؟, اتصالحتو؟.
شادي: دي هي هبلة اصلا, احنا مكناش اتخانقنا عشان كل دا, انا بس كنت متضايق ومبحبش حد يزعجني وانا مركز مانتي عرفاني.
ردت بأسف مخفي.
سلمى: اه عرفاك.
شادي: بس هي كانت هتموت نفسها , مذاكرتش وهيا عندها امتحان النهادرة.
سلمى: بس هي,.....شكلها بتحبك اوي.

شادي: اوي, وانا كمان بحبها اوي, بس مش بطريقتها دي, كده هي بتيجي على حق
حاجات كتير اوي باسم الحب, ومجنونة في تصرفاتها ,المفروض تبقى اعقل من كدا.
سلمى: صدقني الواحدة لما بتحب ممكن تعمل حاجات غريبة جدا, انت ممكن متتصورهاش حتى, والعقل دا بيبقى اخر حاجة بتستخدمها.
شادي: لا مش كده, مفيش بنات كده.
ردت بحزن.
سلمى: صدقني فيه , واكتر من كده كمان.
وسارا جنبا الى جنب , كل غارق في افكاره.
******************
نسمة: تتحسدي, ماسكة الملزمة يعني ونازلة مذاكرة.
ندى: عندي امتحان.
نسمة: لا والله؟, ولسه فاكرة دلوقتي؟.

ندى: يا نيسو يا حبيبتي انتي مش فاهمة ولا عمرك هتفهمي, وانا كمان كنت زيك
كده فاكرة, لما كنت اعد اقول لهالة, انتي هبلة وكده , قالتلي لما تحبي
هتعرفي, والله انا مفهمتش الا لما حبيت شادي.
جلست نسمة في هدوء, وهي تقول.

نسمة: بصي يا ندى, انا قلتلك وهفضل اقلك انتي بالذات, الي انتي فيه دا مش
حب, احنا لسه صغيرين, وبعدين انتي مجنونة في علاقتك بيه بالمنظر دا, ازاي
يعني واحد توقفي كل حياتك عليه, لو متكلمتوش متعرفيش تذاكري او تاكلي, دي
مش طريقة دي.

ندى: يا نسمة يا حبيبتي , لما تحبي هتعرفي يعني ايه انك مش لوحدك, انك
دايما حاسة ان فيه جزء منك في مكان تاني مع حد تاني, وازاي مبتبقيش قادرة
تعيشي من غير الجزء دا,لو بعد عنك لحظة , ازاي تبقي حتى النفس مش قادرة
تاخديه طول مانتو مش مع بعض.

نسمة: مين حمار فهمك كده, انا اعرف ان الحب بيكون مشاركة مش حد اخد جزء
مني ومشي, وان الحد دا يكون قريب وموجود , ومع بعض في حلال ربنا ,
ويساعدني ويشجعني على مصلحتي لانها اهم عنده من مصلحته هو, ويشجعني على
اني اكون احسن.
ندى: طيب ما شادي بيشجعني على المذاكرة دايما وعايزني اتحجب كمان.

نسمة: دا مش حب, دي انانية منه عشان يبرر ازاي هو بيحب مصلحته اكتر منك,
وبعدين لما يخليكي تتحجبي لااسبابه العجيبة, طريقة لبسك وعشان الناس
ميبصولكيش, دا برضة مش عشانك دا عشانه هو, مش عشان الصح.
ندى: طيب انتي يعني لما اتحجبتي , اتحجبتي للصح؟.

نسمة: امال عشان ايه؟, عشان انا المفروض اعمل كده من غير ما يكون حد هو
الي قايلي , او عشان مزعلش الي انا بحبه, يا بنتي حطي اولويات , ربنا
,اهلي , مذاكرتي, شادي, مش تقلبيها كلها من ورا.
ندى: انتي برضة مش فاهمة عشان مجربتيش.

نسمة: انا مش عايزة اجرب , من الي شفته منكو مش عايزة اجرب, انتي فاكرة ان
عمرو مجدي هيخطب اختك في الاخر؟,بيتهيألك, عمرو دا انا شفته واتكلمت معاه
في عيد ميلاد بنت خاله , و مكانش عارف انها انا اخت هالة, مكانش فاكرني,
كنت لسه متحجبة ومعرفنيش, احلفلك بايه انه كان بيعاكس, وكان هيموت ويديني
نمرة تليفونه, وانا مرضتش احرجه واقوله انا اخت هالة, ومرضتش اقول لهالة
عشان هتقول عليا ببالغ وبألف وهتصدقه لو قالها ايه, بصي يا ندى, انتي
عارفة انا بحبك قد ايه, وانتي اقرب الناس ليا , فانا مش عايزة اشوف شادي
دا بياخدك مني ومن نفسك وبيضيعك حتى لو باسم الحب, الي بيحب حد, بيحترمه,
والي يكلمك من ورا الاهل يبقى مش بيحترمك.
قالت بعناد.
ندى: هو مبيكلمنيش من ورا اهلي, ماما عارفة.
شادي: وياترى مامته عارفة؟.
ارتبكت ندى وهي تقول.
ندى: اكيد عارفة.

نسمة: اقولك انا مامته عارفة ايه, عارفة ان شادي بيكلم بنت صايعة واخداه
من مذاكرته وبينزل يقابلها من ورا اهلها, او مصيبة لتكون عارفة ان اهلك
عارفين كمان , كده احنا بقى منظرنا وحش اوي.
ندى: بس يا نسمة اسكتي, مهما عملتي مش هتخليني اكره شادي.
نسمة: انا مقلتلكيش اكرهيه, انا قلت حبي نفسك شوية, حبي اهلك حبي ربنا, شادي دا مش كل حاجة ومش باقيلك زي مانتي متخيلة.
ندى: متقوليش كده.

نسمة: انا عارفة اني بكلامي معاكي بقول كلام في الهوا , وانتي حرة تدخلي
من هنا وتطلعي من هنا, بس انا مش هسكت وهفضل اقولك طول منا عايشة , عشان
ان لسه عندي امل فيكي.
ندى: بقلك ايه يا نسمة, متعمليليش فيها داعية, انتي ملمومة على شوية بنات اليومين دول هيبوظولك دماغك.
نسمة: انا قلتلك وانتي الي عندك اعمليه, ربنا يهديكي.
ندى: خليكي في حالك, انا بحب شادي واستحالة اسيبه.

[b][b]الحلقه الرابعه عشر[/b][/b]
[center]توترت
اصابع ندى وهي تقبض على هاتفها في غضب, وهي تستمع الى صوت الجرس الذي يرن
في اذنها برتابة, ثم القت بالهاتف على السرير في عصبية.
ندى: الغبي مبيردش برضة, انا هتشل يا هالة.
وضعت هالة الكتاب الذي تمسكه بجانبها وهي تقول.
هالة: لأ بقى, انتي هتعدي تروشيني, والله اروح اذاكر عند نسمة في اوضتها,
انا لو منه ما اردش اصلا , دي عاشر مرة تكلميه وهو قالك انا بذاكر
متشغلينيش.
ندى: برضة يرد عليا, افرضي فيه حاجة مهمة وكنت عايزاه ضروري, وفي الاخر يتخانق معايا لو كلمت مامته على البيت.
هالة: انتي شكلك فاضية ودماغك رايقة ولا انا ولا شادي فاضينلك, روحي يا بنتي ذاكريلك شوية بايولوجي واطلعي من دماغنا الله يخليكي.
ندى: انتي ليه مش حاسة بيا, طب والله العظيم اتغير , من اول ما الامتحانات
بتاعتكو ما بدأت ودا اتحول, بقى على طول قافل موبايله يا مبيردش, زي مانتي
شايفة, او مزاجة زفت دايما , وبيعاملني كأني حاجة تخنق , انا زعلانة منه
اوي يا هالة.
لم ترفع هالة عينيها عن الكتاب.
هالة: مممم.
صاحت بها ندى.
ندى: انتي يا زفتة مش معايا اصلا.
القت هالة بالكتاب.
هالة: يادي النيلة, يا بنتي سبيني اذاكر حرام عليكي, وروحي ذاكري انتي كمان, الواد عنده حق, انتي فعلا خنيقة.
ندى: هو مش بيحبني زي ما بحبه, بيعاملني كدة ليه؟.
صاحت بها.
هالة: معرفش.
قالت ندى بتصميم.
ندى: انا هجي بكرة الجامعة بعد الامتحان بتاعكو.
هالة: اتفلقي, بس سبيني اذاكر, بقلك ايه انا هسيبلك الاوضة خالص, وهعد اذاكر عند نسمة, اهي ارحم منك على الاقل لسانها جوا بقها.
ندى: هتسبيني لوحدي؟, انا كده هتجن من التفكير.
قالت هالة قبل ان تدخل غرفة نسمة.
هالة: ماهو بدل ما اسقط انا.
*****************
نظر شادي مندهشا الى ندى التي كانت في انتظاره اسفل لجنة الامتحان, بمجرد ما رآها اقبل عليها.
شادي: ندى, ازيك ؟, بتعملي ايه هنا؟.
ندى: جيت اطمن عليك, الامتحان كان ايه؟.
شادي: كان كويس الحمد لله.
ندى: كويس.
وصمتا قليلا, ثم قال.
شادي: انتي جيتي مع هالة؟.
ندى: لأ. هالة جت بدري, انا قلت اجي قبل ما تخرجو عشان معدش لوحدي كتير.
شادي: انتي مش وركي درس النهاردة؟.
ندى: لا دا مراجعة وانا هطنشه مش رايحة.
في هذه اللحظة خرجت سلمى من اللجنة فيمن خرج, فلمحتهما.
سلمى: هاي ندى.
وقبلتها,وهي تسأل.
سلمى: بتعملي ايه هنا؟, اختك عملت ايه في الامتحان؟.
ندى: والله لسه معرفش, مشفتهاش, انا جيت على لجنتكو على طول.
سلمى: صحيح يا شادي, عملت ايه في السؤال التالت؟.
شادي: دا سؤال غبي, انا افتكرت الجدول الي في الباب الرابع بالعافية.
سلمى: جدول ايه يخرب عقلك,الامتحان مفيهوش جداول, انا معملتش جداول, جدول ايه يا خبر ابيض.
شادي: ياعبيطة السؤال الاول كمان فيه جدول.
سلمى: الصغير الي في اخر الكلام دا انا عملته, بس التالت دا جدول ايه؟.
شعرت ندى بالضجر من الحديث فانتحت جانبا, خاصة بعد وصول معظم الدفعة
لمراجعة الاجابات مع شادي, وشردت قليلا , ثم افاقت على طرقات خفيفة على
كتفها.
هالة: بتعملي ايه هنا؟.
التفتت ندى لاختها التي وضعت كفها على كتفها.
ندى: كنت جايالكو.
هالة: جيالنا مين بقى, انتي جياله هو.
ندى: يعني هو همه, ماهو واقف مع اصحابه ونسي اني هنا اصلا.
هالة: اه صحيح اما اروح اسأله على السؤال التالت عمل فيه ايه؟.
ندى: متتعبيش نفسك ,الاجابة الجدول الي في الباب الرابع الي مرضتيش تذاكريه امبارح.
هالة: يادي النيلة, دانا كتبته حاجة تانية خالص, هي الجداول دي حد بيذاكرها اصلا؟.
قالت ندى وعينيها لازالت معلقة بشادي المحاط بأصدقائه.
ندى: ايوة , شادي بيذاكر كل حاجة, مذاكرته اهم حاجة عنده في الدنيا.
وبعد مدة عاد اليها شادي مبتسما.
شادي: محدش في الدفعة عرف حكاية الجدول دي ولا ايه؟, هاي يا هالة.
هالة: انت يا بني دحيح مش بتاع هذار, لو كنت معايا في لجنتي كنت غشيت منك غش.
شادي: ومين قال اني كنت هغششك اصلا, بقى انا اذاكر واتعب وانتي تاخدي على الجاهز.
ثم التفت الى ندى التي تعكر مزاجها.
شادي: مالك يا بنتي؟, مبوزة ليه؟.
اشاحت ندى بوجهها في ضيق.
ندى: مفيش.
قالت هالة.
هالة: ااااه, اسيبكو انا لحسن تولعو في بعض قدامي.
وانصرفت,بينما قال شادي لندى في دهشة.
شادي: مالك يا ندى؟,قالبة وشك ليه؟.
ندى: انت بجد مش حاسس انك عامل حاجة؟.
شادي: عامل ايه ياندى خير.
التفتت تقول له بعصبية.
ندى: انت مبتهتمش غير بنفسك وبس , اهم حاجة عندك مذاكرتك وبس , وانا مش
مهم خالص اصلا, كأني ماليش اهمية عندك, انا درجة تانية , والمهم اصحابك
ومصلحتك ومامتك......
شادي: ايه ايه ايه, فيه ايه ياندى؟, طلعتي فيا ليه؟, انتي كنتي كويسة من شوية , قالتلك ايه هالة غيرتك؟.
ندى: هالة مقالتليش حاجة يا شادي, انا الي اتخنقت, انت ايه يا اخي
مبتحبنيش , دنتا لو مبتحبنيش هتهتم اكتر من كده, هتسأل حتى, ممكن افهم ايه
الي بيحصلك في الامتحانات ؟, بتتغير ليه؟, بتبعد عني بالشكل دا ليه؟.
شادي: ندى ,ندى, انتي مالك؟, متضايقة من حاجة وبتطلعيها عليا؟, مانتي كنتي كويسة.
ندى: لا انا مكنتش كويسة, بس انت الي مش بتاخد بالك, انا سايبة مذاكرتي
برضة الي وللعلم كتيرة, وجاية عشان اشوفك بعد الامتحان عشان اطمن عليك
تقوم سايبني وواقف مع اصحابك كأني مجتش, وامبارح طول الليل بكلم فيك
مبتردش عليا, دانا لو في المستشفي وبتصل بيك كنت مت وانت مسألتش.
شادي: الله يا ندى مانتي عارفة اني مبحبش حد يزعجني وانا بذاكر, عشان ببقى مركز.
ندى: والله , ودا لناس وناس بقى, لاني وانا بتصل كنت بلاقيك ساعات مشغول,
الي مش عايز حد يزعجه بيقفل موبايله يا استاذ ,مش بيرد على ناس ناس.
شادي: بالراحة ياندى وطي صوتك وافهمي الاول, انا يابنتي كنت قافل صوت
الموبايل, ولما كنتي بتلاقيه مشغول اكيد انا كنت بتصل بسامح ولا بلومي ولا
بحد بسأله في حاجة , ماهو انا في امتحانات وانتي مسيرك تجربي تفهمي.
قالت وعيناها تدمعان.
ندى: تقوم متردش عليا, مستاهلش منك كلمة واحدة تطمني عليك.
شادي: ايه دا يا ندى؟, لا دانتي زعلانة اوي, لا اهدي, والله العظيم ما كان
قصدي اقلقك او اضايقك, انا بس كنت بتصرف على اساس اني معرفك انك متشغلنيش
بس .
ندى: خلاص يا شادي.
واشاحت بوجهها عنه تبكي.
شادي: انتي بتعيطي؟.
وانتظر حتى هدأت قليلا, ثم قال لها.
شادي: طب انتي فاضية النهاردة؟.
ندى: بتسأل ليه؟, يهمك يعني؟.
شادي: عشان انا عازمك على اغدا , مادام الامتحان كان حلو , وانا لازم اصالحك.
ندى: ياسلام؟.
شادي: والله العظيم, وحياة عنيكي الحلوين الي انا عيطتهم دول, عشان متزعليش مني تاني.
*************************
"وبعدها اتمشينا شوية ووصلني وروح"
قالت ندى هذا الكلام وهي مستلقاة على ظهرها بسرير غرفتها ,وتتكلم بهيام.
نسمة: يـــــا حلاوتك.
بينما احمر وجة ميسون صديقة نسمة وهي تستمع الى الحديث الذي يدور, بينما
قالت هايدي وهي تقوم من مكانها بجانب هالة لتضرب ندى على ساقها.
هايدي: فوقي يابت , انتي شاربة حاجة ولا ايه؟, ايه يعني الواد خرجك خروجة وفسحك شوية, اوام كده نسيتي الي عمله فيكي.
همست ميسون لنسمة.
ميسون: قومي نروح نعد في اوضتك عشان يعرفو يتكلمو براحتهم.
قالت نسمة بصوت عالي.
نسمة: يعني انتي شايفاهم مكسوفين منك اصلا, يا بنتي دول وشهم مكشوف كده عــــادي .
اعتدلت ندى وهي تقول لهايدي.
ندى: انتي بتقولي فيها, طب والله العظيم نسيت حتى اني كنت متضايقة منه.
قالت هالة وهي تتنهد.
هالة: ماهو احنا كده بوردة وكلمتين حلوين بنتنح وننسى.
هايدي: انتي يابنتي انتي مبتحرميش انا مش قلتلك امه متتطاقش.
مالت نسمة على اذن ميسون.
نسمة: اصلها كانت ماشية معاه قبلها.
ازداد احمرار وجه الفتاة وهي تنظر اليهما في دهشة.
نسمة: منا قلتلك احنا عيلة عادي.
ميسون: انا مقلتش حاجة.
نسمة: انا قلتلك بلاش تتعرفي عليهم هيلخبطولك كل الي انتي اتربيتي عليه في حياتك.
بينما همست هايدي لهالة.
هايدي: مين فيلم الخطايا الي قاعدة دي؟.
هالة: شششش, دي انتيمة نسمة, بس ايه, خام خام خام.
هايدي: هو لسه فيه بنات كده اصلا.
هالة: اديكي شفتي.
هايدي: اهي اختك نسمة دي الي غريبة, غيركو خالص, طب انتي واتحجبتي عشان اخت عمرو بتتكلم عليكي, دي ايه الي جابرها دلوقتي؟.
هالة: بس لحسن ندى الي دلوقتي بتفكر , شادي لاعبلها في دماغها, عزومة تانية ومش بعيد نلاقيها لابسة اسدال.
هايدي: يــــع.
هالة: اه والله العظيم, الواد قاعد يزن عليها , عيب واعدلي لبسك واختك اتحجبت, انتي مش صغيرة, وانا بغير عليكي وشغل الولاد دا بقى.
هايدي: دي تبقى مجنونة.
هالة: منا قلتلك انا في عيلة المورستان, واحدة مجنونة والتانية شيخة جامع, وانا , تخيلي بقى.
هايدي: الله يكون في عون امكو وابوكو.
بينما قالت نسمة لميسون في نفس اللحظة.
نسمة: اهو انا عايشة في مستشفى المجانين, اتنين حبيبة ودماغهم اتلحست, وماما طراوة خالص, وبابا ولا هو هنا اصلا.
فاحمر وجه ميسون في اندهاش , وهي تدير وجهها في الفتيات حولها بخوف.

[/size]

الحلقه الثامنه عشر



دخلت والدة شادي من
بلكونة البيت وهي تقول له, وهو جالس في غرفة المعيشة امام التلفاز مع
اخيه.
الام: هي ندى اتحجبت؟.
نظر اليها مندهشا من السؤال.
شادي: اه, وانتي
عرفتي منين؟.
الام: اصلي شفت امبارح بنت معصعصة كدة , شبهت عليها بس شكيت عشانها
كانت لابسة طرحة.
شادي: لا ,ممكن تكون هي.
وصمتت قليلا ثم قالت.
الام: وهي
مالها كده مطلعة نص شعرها برة؟,انا عارفة انت عاجبك فيها ايه؟.
قال شادي بنفاذ
صبر.
شادي: وبعدين بقى ياماما , احنا مش اتفقنا تبطلي تلقيح كلام, والي عايزة
تقوليه قوليه على طول.
الام: وانا القح ليه يا خويا انت حر, انتي مش كبير وعارف
مصلحتك, لما نشوف هتطلع من الاوائل على الدفعة ولا لأ, ونشوف ست الننوسة بتاعتك
هتجيب كام في الثانوية العامة.
قام شادي وهو يرتدي خفه.
شادي: انا غلطان اني
برد عليكي اصلا, انا هقوم خالص من هنا, عشان مانمسكش في بعض زي كل مرة.
وبعد
انصرافه التفتت الام لاخيه المتضجع بجانبها على الاريكة.
الام: هو انا كلمته
دا؟.
هاني: وهو انتي بتعملي حاجة ابدا.
لطمته على ساقه وهي تقول.
الام:
قصدك ايه يازفت انت؟.
اعتدل وهو يقول.
هاني: مقصديش يا فريدة ياقمر, بس انتي
ارضي عني الله يرضى عنك, هو جزمة قديمة وانا اصلا طالع اضربهولك.
وذهب خلف اخيه
في سرعة ليتخلص من رفقة امه.
هاني: انتي خلعت وسبتني لوحدي.
شادي: مش احسن
مااتخانق معاها.
هاني: تقوم سايبني عشان تاكلني انا.
شادي: والله ماعارف
احلها ازاي دي, امي هتفضل تكرة ندى لحد امتى.
هاني: هههه, لحد ماتسيبها وتكلم
واحدة تانية , هتتشغل وتطلع عين التانية.
شادي: مبهذرش يا هاني, انت لسه مش فاهم
عشان صغير, لما تكبر وتحب, وتلاقي ماما بدأت تخنق عليك هتفهمني.
هاني: انت
محسسني انك خلاص رايح تتقدم بكرة, عادي يا بني فكك, على ما المواضيع دي ما تبقى
رسمى هتكون امك نسيت اصلا, وابوك عايز يخلص منك , ومش هتبقى فارقة معاها ندى ولا
فتكات حتى.
شادي: وهي امك دي بتنسى برضة.
هاني: بس يا شود انت الي ع الحجر,
يعني لما اتشجنت لها شوية بقت تخاف منك, و يادوب بتلقح كلام من بعيد, بس مبتعملش
حاجة, امال انا الي اعمل ايه, دي خدت الموبايل ومشيت على نمر البنات بنت بنت تتصل
بيها تهزأها, وخلت شكلي زبالة قدامهم في الدروس.
شرد شادي ثم قال.
شادي: انا
بجد مش عارف اعمل ايه؟, هي صحيح ندى طيبة وبتسمع كلامي, بس لو حصلت مشكلة في مرة
بينها وبين ماما, مش عارف هقف في صف مين.
**********************
ندى: الو ,
ايوة لقيت حاجة؟.
شادي: لا , المواقع كلها مش راضية تفتح, انا قاعد عليهم بقالي
ساعة, النت تقيل جدا النهاردة.
ندى: ربنا يستر , انا خايفة اوي يا
شادي.
شادي: هي هالة لسه بتدور.
ندى: هي يادوب عرفت تفتح الموقع وحطت رقم
الجلوس, وبيحمل من ساعتها وخايفة لاتقفله منعرفش نفتح الموقع تاني.
شادي: لا ان
شاء الله خير, دانتي نودي برضة , طبعا جامدة.
ندى: والله يا شادي مرعوبة, انا
اعصابي باظت, خايفة اوي من درجة الرياضة.
شادي: لا متخافيش , ان شاء الله درجاتك
جامدة كمان.
ندى: ليه هو انا زيك, الاول على الدفعة مستريح.
شادي: الله اكبر,
انتي بتقري يا بنتي ولا ايه؟.
ندى: يعني بذكائك كده, انا ممكن اقر عليك؟, انا
غيرك يا شادي, انا يهمني مصلحتك اكتر من مصلحتي انا حتى.
شادي: اهو
كلام.
ندى: يعني ايه كلام؟, لا طبعا مش كلام.
شادي: لا كلام, محدش بيحب حد
اكتر من مصلحته.
ندى: افهم من كده انك مبتحبنيش اكتر من مصلحتك؟؟؟.
صاح شادي
فجأة.
شادي: اهه,.....اهه,....الموقع فتح اهه, رقم الجلوس, قلتيلي كام.
نست
ندى الحديث السابق وهي تمليه رقم جلوسها في سرعة,فصمت قليلا ثم قال في
لهفة.
شادي: فتح فتح هاتي ورقة وقلم.
*************************
جففت ندى
دموعها وهي جالسة في حضن امها , بينما قال ابوها في غضب.
الاب: انا قلت من
الاول, علوم ايه وزفت ايه الي هتدخله دي, لو كانت اخدت كيميا, كان زمانها فلحت,
وكملت ودخلت هندسة, حتى لو هندسة خاصة.
الام: ازاي يعني؟ , اذا كانت كل الي
موقعها الرياضة والعربي وجايبة في الاحياء 49 من 50.
الاب: برضه هي غيبة , كانت
المفروض تمسك العصاية من النص, دلوقتي هتعمل ايه هي بال 93 بتاعتها دي, دول
ميودوهاش حتى تمريض, وياريتهم 93 دول 92 وستة من عشرة.
عادوت ندى البكاء وهي
ترتجف لسخرية والدها, بينما قالت نسمة في هدوء.
نسمة: ملحوقة يابابا, هي اصلا
مبتحبش الرياضة ولا الفيزيا, تحول ادبي.
التفت الجميع اليها ,وكانها قالت شيئا
نكرا.
نسمة : ايه فيه ايه مالكو؟, انا قلت حاجة غلط؟, بتبصولي كده
ليه؟.
هالة: لا طبعا انتي هبلة, هتكمل علمي, ادبي ايه دا الي تحوله؟.
نسمة:
وماله الادبي؟, وبعدين دي حاجة هي الي تقررها, متضغطوش عليها.
هالة: مالكيش دعوة
انتي, خليكي في نفسك, قال تحول ادبي قال.
نسمة: وتعمل ايه لما الفيزيا تجيبها
ورا؟.
هنا صاح الاب.
الاب: بس انتي وهي, لما نشوف هنعمل ايه في المشكلة دي,
ابقى اسألها في فنون تطبيقية ولا جميلة , ممكن تدخل من علمي علوم ولا لأ.
نسمة:
هو كل الي مدايقك انها مش هتطلع مهندسة, مايمكن هي عايزة حاجة تانية.
هالة: هي
مش عايزة حاجة تانية, هي عايزة الي احنا عايزينه.
قالت نسمة بسخرية.
نسمة:
صحيح , يعني هي كانت اول مرة حد يفكرلها, ما هي على طول حد بيفكرلها, حتى نسيت ان
عندها مذاكرة من قلة التفكير.
لكزتها هالة في ذراعها وهي تقول.
نسمة: لسانك
دا ايه , عايز القطع.
فقالت الام تنهرهما.
هالة: بس يابنات, سيبو اختكو , مش
كفاية هي زعلانة, خلاص بابا هيعمل الي قال عليه وان شاء الله ربنا يقدم الي فيه
الخير.
**************************


**
شادي: يسأل ,فنون جميلة
ديكور ولا تطبيقية ديكور , تقريبا عادي يكون علمي علوم.
ردت ندى بتكاسل.
ندى:
والله انا لسه مش عارفة يعني امبارح البت نسمة قعدت تلعب في دماغي, بتقولي احول
ادبي, انا طول عمري شاطرة في التاريخ والحاجات دي.
قال شادي مفزوعا.
شادي:
ايه , اوعي, ادبي ايه انتي اتجننتي, وفي الاخر تدخلى ايه, دانتي تكملي علمي ان
شالله حتى تدخلي علوم.
ندى: ان شالله حتى تدخلي علوم, على اساس ان علوم دي كده
سهل ان اي حد يدخلها ولا من غير مجموع, طب ياريت.
شادي: يعني ايه يا ريت, لا
ياندى بقلك ايه, انتي السنة دي تذاكري باديكي وسنانك, لازم تجيبي مجموع كبير, تعوضي
مصيبة السنة دي.
ندى: الله يا شادي؟,ايه مصيبة دي, انا مش ساقطة, انا جايبة
مجموع كويس ناس كتير معرفتش تجيبه, وجايبة في البيولوجي 49 , متحسسنيش بقى انك
دكتور واني صنايع.
شادي: لا ياندى, انتي السنة دي قضيتيها لعب, واهملتي فعلا في
مذاكرتك كتير.
ندى: تصدق بالله, انت ماتستاهل فعلا اني كنت اضيع وقتي عليك, يعني
انا مين الي كان شاغلني عن مذاكرتي وايام الامتحانات كان مقرفني في عيشتي
ومبيكلمنيش, وفي الاخر تطلع انت امتياز ,وانا 93 ميدخلونيش بيطري حتى, عموما انا
فهمت فعلا اني لازم اعمل زيك, اشوف مصلحتي قبلك, وقبل اي حد.
شادي: طب كويس
اديني علمتك حاجة.
ندى: انت بارد كدة ليه؟, ...انا حاسة انك متغير من ساعة
النتيجة ما طلعت.
شادي: ندى , متفوقيش عليا انتي كمان, انا لسه خلصان من
اشتغالات ماما, ومش طايق نفسي.
ندى: طيب, هتخرجتي بكرة ولا لأ؟.
شادي: مش
فاضي, عندي بكرة امتحان سواقة, وهبقى متيس بقيت اليوم, انا عارف نفسي.
ندى: طيب
بعد الامتحان, ولو حتى شوية صغيرين , انت واحشني اوي , وانا مشفتكش من ساعة مارحنا
نركب خيل.
شادي: هبقى اشوف ياندى ان شاء الله, يلا بقى , انا هقفل عشان انام,
عايز ابقى فايق بكرة.
ندى: ماشي يا حبيبي, بس عشان خاطري تحاول نخرج
بكرة.
شادي: ربنا يسهل, خدي بالك من نفسك.
ندى: وانت كمان يا حبيبي.
شادي:
سلام.
ندى: مع السلامة.
مرت نسمة من خلفها ,وهي تدندن ساخرة.
نسمة: بكرة
تندم تندم, ياحبيبي.
ندى: اطلعي منها يارخمة.
نسمة: طب اعرفي انتي تطلعي منها
الاول.
في هذه الحظة دخلت هالة كالاعصار من باب البيت, وتخطتهما بالصالون وعبرت
في ثوان الى غرفتها, فنظرتا الى بعضهما في دهشة.
نسمة: عمرو عمل مصيبة
تاني.
اندفعتا في سرعة خلف هالة ,ودخلتا تنظران اليها وهي تبدل ملابسها
بعصبية.
نسمة: لا, كدة مش كفاية, قطعي الهدوم احسن.
لم تجبها هالة, انما
اندفعت لدورة المياة في عنف,ثم عادت واطلت برأسها.
هالة: ارجع ملاقيش ولا واحدة
فيكو هنا.
وبالفعل امتثلتا لانها قالت الكلمة دون مزاح, وظلتا تتسائلان عن سبب
غضبها , حتى انتهى المقام بها في فراشها, فقالت نسمة لندى قبل ان تدخل
غرفتها.
نسمة: ابقي اعرفيلي ايه الموضوع واحكيلي بكرة.
ندى: مش دا لو قالتلي
اصلا.
ودخلت ببطء الغرفة, ولم تضيء المصباح, بل تسمعت قليلا الى ان تاكدت ان
هالة تبكي,فاقتربت وجلست على طرف سريرها, وقالت بهدوء وهي تضع يدها على
رأسها.
ندى: لو مش عايزة تحكيلي مش هسألك.
قامت هالة واعتدلت وهي
تبكي.
ندى: فيه ايه الي حصل؟, عمرو برضه؟.
اومأت هالة برأسها ايجابا.
ندى:
حد شافه مع بنت برضه؟.
اومأت هالة برأسها نفيا.
ندى: امال ايه الي
حصل؟.
هدأت هالة قليلا وهي تقول.
هالة: انا كنت معاه في العربية, وبكلمه في
موضوع البنت الي انتي شفتيها معاه, وبعدين جت سيرة اسمه ايه الصاوي دا ,الي في خدمة
اجتماعية بقاله ميت سنة هناك, معرفش ايه الي جاب السيرة المهم وقع بلسانه انه كان
خارج معاه, قمت بهدلته.
ندى: مش الصاوي دا الواد البايئة البايظ خالص
دا.
هالة: ايوة يا ستي, وانا متأكدة انه لما بيخرج معاه بيشربه زفت حشيش , وانا
قلتله ميت مرة مايصاحبوش, دا واد بيئة ومش من قيمته خالص, وبعدين مبوظه على
الاخر.
ندى: ياخبر حشيش, وبعدين.
هالة: قام قعد يزعقلي ويقولي انا حر, وانتي
مش هتنقيلي اصحابي ,وانا امشي مع الي عايزة, وقعد يقل ادبه كتير كده, قلتله انت مش
عايز واحدة تخاف عليك انت عايز واحدة تسيبك تموت نفسك, وبعدين انت مش قلتلي انك
بطلت تشرب الحاجات دي,قعد يقولي, هو انا بشرب الا كل فترة , ووالله كنت مبطل, راح
موبايله رن, ومرضيش يرد, قلتله رد مرضيش, قلتله طب هات ارد انا برضة مرضيش, قلتله
دي بنت ولا ايه؟, قعد يزعق ويتوة في الكلام, جيت اخد الموبايل شده مني, قمت اتخانقت
معاه جامد وشتمته وسبتله العربية ,واخدت تاكسي وجيت.
ندى: وبعدين؟.
هالة:
مفيش بعدين, فضل ماشي بالعربية ورا التاكسي لغاية ما وصلت البيت وكنت قافلة
الموبايل , اكيد كان بيتصل.
ندى: يعني هو دلوقتي تحت؟.
هالة: لا مشي من شوية,
منا بصيت ملقتوش.
ندى: طيب انتي بتعيطي ليه؟.
هالة: انا مبقتش عارفة اعمله
ايه يا ندى, هيجنني , مش ملاحقة عليه من هنا ولا من هنا, الاقيها من البنات ولا
البلاوي الي بيشربها, ولا من كدبه عليا ولا من ايه؟, انا تعبت معاه خلاص, عمرو دا
خلاني ماشية عنيا في وسط راسي من كتر مصايبه.
ندى: انتي مش بتحبيه, معلش
سامحيه.
هالة: لحد امتى؟؟, لحد امتى ,دا مبيتغيرش ابدا, انا تعبت معاه وامه تعبت
معاه, وخالد صاحبه تعب معاه, مفيش مبيحسش.
ندى: خلاص يا لولو, مسيره
يعقل.
هالة: انا مبقتش عارفة اعمل معاه ايه, وكل مرة يرجعلي يقولي اخر مرة,
ومامته تقولي هو مبيحبش الا انتي, منا عارفة انه مبيحبش الا انا, بس انا
تعبت.
ندى: بصي يا لولو, انتو ابعدو عن بعض فترة, اهدو فيها, وبعد كده فكرو ازاي
هتحلو مشاكلكو دي, دا هو خلاص بقى على وش تخرج وان شاء الله انتو على وش خطوبة,
ربنا يهديكو.
هالة: انا زعلانة منه اوي يا ندى , اوي.
ندى: متزعليش نفسك,
بكرة ان شاء الله تتصالحو,... لااااا دا الحمد لله على شادي, شوفي كنت بقول عليه
بارد ومتحكم وبتاع, بس دا ملاك بالنسبة لعمرو, على الاقل انا واثقة من انه مبيبصش
لحد تاني , لانه بصلي انا بالعافية اصلا.
مسحت هالة عينيها وهي تقول.
هالة:
شادي دا حمى اصلا, دا لو قرب على سيجارة امه تاكله, انتي بتهذري, عامل عليكي انتي
بس راجل.
ندى: ربنا يهديه يا ستي, دا مؤدب ومحترم , وبيخاف عليا, وخلاني اتحجب
ودايما بيزعقلي لما بقطع في الصلاة, لا شادي, يتشهدله بجد.
هالة: بكرة تيجي الي
تفتح عنيه وتاخده منك, وساعتها مش هتعرفي تتلمي عليه.
صاحت بها ندى.
ندى: اخص
عليكي يا كلبة, اهو انتي.
***********************
سلمى: الو, ايه عملت ايه
في الامتحان؟.
شادي: موقعتش ولا قرطاس.
سلمى: ايه الشطارة دي؟, يعني نقول
مبروك على الرخصة؟.
شادي: اكيد ان شاء الله.
سلمى: دنا كلمتك من شوية لقيتك
مشغول, ايه كنت بتكلم ندى؟.
شادي: لا دنا كنت بكلم ماما بطمنها, ندى مين يا
بنتي, ندى تلاقيها نايمة دلوقتي, وقال ايه كانت عايزة تخرج دلوقتي, شوفي انا الي
فضيت وهي لا.
سلمى: خلاص ولا تزعل نفسك, افوت عليك انا وريكا نتغدا برة
النهاردة.
شادي: ماشي, اكلم الواد سامح اشوف نظامه ايه.
سلمى: قشطة, هصحي
ريهام واكلمك بقى.
شادي: اوكاي يا قمر , هكلمك تاني.
سلمى: سلام.
شادي:
باي.

الحلقه التاسعه عشر



ندى: انت فين؟.
قام شادي من
المنضدة يبتعد بالهاتف عن سلمى وريهام وسامح, اللذان انخرطا في حديث جانبي, بينما
تتبعت سلمى شادي ببصرها بعصبية, وهو يهمس.
شادي: انتي متنرفزة ليه طيب؟.
ندى:
عشان لا كلمتني ولا اهتميت اصلا, وانا افتكرتك روحت تنام , الاقيك في الاخر خارج مع
اصحابك يا شادي.
شادي: مانتي كنتي نايمة اعمل ايه يعني؟.
ندى: انا مش قايلالك
انا عايزة اخرج معاك؟, تخرج مع اصحابك ليه؟.
شادي: خلاص يا ستي, قومي البسي
وتعاليلنا.
ندى: انت مبتفهمش يا شادي؟, انا كنت عايزة اكون معاك لوحدي, عايز
تخرجني مع اصحابك؟.
شادي: خلاص يا حبيبتي, بكرة ان شاء الله اخرج معاكي لوحدنا
خالص انا وانتي, ومن الصبح كمان.
ندى: انت كداب, بكرة هتتحججلي بميت
حجة.
شادي: لا ياحبيبة قلبي ان شاء الله هنخرج سوا, بس متزعليش بقى, انا مقدرش
ازعلك مني.
ندى: ماهو انت تزعلني وبعد كده تضحك عليا,تقولي انا مبقدرش ازعلك,
فاكرني هبلة.
اخذ شادي يصالح ندى فترة حتى هدأت ,واتفقا على الخروج سويا في
اليوم التالي,وانهى المحادثة وعاد لاصدقائه,فتسائلت سلمى بلهفة, وهو يجلس.
سلمي:
ايه؟, هتيجي؟.
شادي: لا مش جاية, زعلت عشان انا مخرجتش معاها, وخرجت
معاكو.
لاح في عينيها شيء من السعادة,ثم قالت متصنعة الضيق.
سلمى: لا طبعا مش
من حقها تزعل.
شادي: منا قلتلها كده, قالتلي انت طنشتني وكلام فاضي
كده.
سلمى: ايه شغل العيال دا؟.
رمقتها ريهام بنظرة جانبية, ثم قالت
لشادي.
ريهام: معلش يا شادي , هي بس اكيد كانت متعشمة تخرج معاك النهاردة.
ثم
نظرت الى سلمى وهي تقول بلهجة ذات مغزى.
ريهام: وكده يبقى عندها حق.
في نفس
الوقت وضعت ندى هاتفها على المكتب بغرفتها ,وهي تهز ساقها في توتر.
هايدي: ايه
يا بنتي انتي؟, روشتينا , هزيتي الاوضة ارحمينا.
ندى: خارج مع اصحابه بيتغدا
بره, قال ايه اتفق مع سلمى وريهام ومينفعش بعد ما نزلهم يسيبهم , الاستاذ بيقولي
تعالي انتي.
هالة: البنات دي خنيقة اصلا, انا مش عارفة انتي بتطيقي تشوفي وشهم
ازاي.
قالت هايدي في تساؤل, وهي تقشر موزة.
هايدي: سامح معاهم؟.
ندى: ايوة
يا ستي.
هايدي: الواطي, وقال ايه بيقولي رايح اصلح العربية.
ندى: على فكرة يا
ديدي ,فيه موضوع كدة كنت خايفة اقلك عليه, بس انا مش عارفة انتي لاحظتي ولا
لأ.
ردت هايدي بسرعة, وهي تأكل الموزة.
هايدي: عارفة, مش موضوع ريهام وسامح؟,
عارفاه.
نظرت اليها ندى بدهشة.
ندى: يعني ايه عارفاه؟, دول مرتبطين يا بنتي,
انتي ازاي ساكتة على كده.
ردت هايدي ببساطة, وهي تأكل.
هايدي: عادي يا بنتي,
فكك, انا وسامح اصلا مش مرتبطين اوي يعني.
في نفس اللحظة دخلت نسمة ,يتبعها صوت
والدها هاتفا في غضب.
الاب: اصل انا كنت ناقصك انتي كمان.
أغلقت الباب خلفها
في احكام, واستندت عليه.
هالة: ماله بيزعق ليه؟.
توجهت نسمة لفراش ندى, وجلست
على طرفة وهي تقول.
نسمة: اصل انا قلتله.
هالة: ههههههههه, والله
تستاهلي.
تعجبت هايدي.
هايدي: قالتله على ايه؟.
هالة: اصل الهانم عايزة
تدخل ادبي, بابا طبعا مش هيرضى.
قالت هايدي لنسمة في هتاف.
هايدي: قشطة يا
بنتي , ريحي دماغك بلا مذاكرة بلا قرف, اديني ذاكرت وطلع عيني كيميا وفيزيا شفتي
الي حصلي, في الاخر تجارة انجلش.
نسمة: ومين قال ان الادبي مش مذاكرة, بس مش
لازم العيلة كلها تدخل هندسة يعني, انا اصلا كرهت الهندسة دي من كتر مانتو هتموتو
عليها,على فكرة انتو دماغكو تعبانة خالص.
هالة: والله ماحد دماغه تعبانه الا
انتي, طب جربي حظك طيب في العلمي الاول. وابقى اتنيلي حولي بعدين.
نسمة: هي حلة
محشي؟, جربي حظك الاول, طب انتي ودلوعة بابا وكنتي طول عمرك عايزة هندسة, والتحفة
التانية انتو الي بتمشوها , انا بقى سيبوني اختار انا عايزة ايه وبحب ايه.
هالة:
انتي اصلا مبتسمعيش كلام حد, ماشية بدماغك.
نسمة: مش احسن ما امشي بدماغك انتي,
وانتي تمشي حافية.
قامت هالة في سرعة وخطفت الوسادة والقتها على نسمة وهي
تصيح.
هالة: انا دماغي جزمة يا جزمة.
فارتطمت الوسادة بوجه ندى التي كانت
شاردة, فصاحت بضيق.
ندى: ايه ؟, ايه الغباء دا؟.
نسمة: انتي هنا يا كتكوتة,
مكانش طالعلك صوت يعني , مالك؟.
هايدي: سبيها سبيها, هتموت من ساعة ماعرفت ان
شادي خارج مع اصحابه وقلبها.
قالت ندى بحزن وهي شاردة.
ندى: كده يا شادي, اخص
عليك.
**********************
سارع شادي بخطاه وهو يسير مع سلمى , يسبقان
ريهام وسامح في طريق عودتهم لركوب سيارة سامح, فتوقفت امامهما فتاة صغيرة رثة
الثياب, تبيع الورد.
الفتاة: ورد يا بيه؟, ورد للامورة.
قال شادي
بعفوية.
شادي: مهيش امورة.
وحاول تخطيها في سرعة وهو يبتسم لسلمى قاصدا
المزاح, فتبعتهما الفتاة.
الفتاة: لا يا بيه, دي امورة وزي العسل كمان, خدلها
وردة عشان متزعلش.
شادي: مش هتزعل.
فالتفتت الفتاة تقول لسلمى في
الحاح.
الفتاة: خلى حبيبك يا ابلة يشتريلك وردة, هو مبيحبكيش ولا ايه؟.
احمر
وجه سلمى في سرعة من جراء الكلام, فقال شادي.
شادي: احنا اخوات يا ستي, ريحي
نفسك.
الفتاة: لا ازاي؟, مش اخوات, انت اسمر , وهي بيضة زي القشطة.
شادي:
خلاص بقى خلصنا.
الفتاة: يابيه, والنبي يا بيه تاخد وردة يا بيه , والنبي لحسن
الامورة تزعل.
شادي: ماقلتلك ماحناش حبايب, بصي ارجعي ورا شوية هتلاقي اتنين
حبيبة بجد, غلسي عليهم, هيشترو منك.
الفتاة: انت مش عايز تنفعني ليه يا
بيه؟.
شادي: متتعبيش نفسك مش هتكسف منها اقوم اشتري منك , دا هي حتى لسه مسلفاني
عشرة جنية.
الفتاة: طب اشتريلها وردة منهم.
قال وقد بدأ يشعر بالضيق
منها.
شادي: ماخلاص بقى قلنا مسلفاني, روحي بجد ورا هتلاقي اتنين اصحابنا
اشتغليهم.
شعرت سلمى بشيء من الخجل لانكاره الشديد والمتكرر ,لفكرة ان يكونا معا
لسبب اخر غير الصداقة, وشعرت بضرورة انهاء هذا الوضع المحرج لالحاح الفتاة الشديد,
فقالت لها في رفق.
سلمى: استني يا شاطرة, انا هاخد منك وردة.
قالت الفتاة
لشادي في انتصار, وهي تضحك.
الفتاة: انا مش قلتلك هي جميلة وزي العسل.
واعطت
الوردة لسلمى وهي تأخذ النقود,وقالت ناظرة الى شادي بغضب طفولي بريء.
الفتاة: هو
وحش, مش واخد باله منك يا ابلة, اوعي تسلفيه تاني.
وانصرفت عنهما ركضا, بينما
ازداد احمرار وجه سلمى .
شادي: اشتريتي منها ليه؟, دول عيال نصابة.
سلمى:
حرام يا شادي شكلها غلبان, وبعدين مكانتش هتسيبنا الا لما نشتري منها.
شادي:
برضة مكانش لازم نساعدهم على الغلاسة دي.
قالت سلمى بمزاح خجول.
سلمى: انت مش
عايزني اشتريلك وردة بقى؟.
شادي: ايه دا؟, انتي شارياهالي؟.
ناولته سلمى
الوردة.
سلمى: عشان تبقى تفتكرني.
شادي: انا هنساكي ازاي ,وانتي ليل نهار وشك
في وشي مش عارف اخلص منك اصلا.
سلمى: ياسلام.
وصلا في هذه اللحظة الى السيارة
فتوقفا امامها يتحدثان.
شادي: يا لومي انتي اعز صاحبة عندي في الدنيا كلها, هو
انا حد بيحللي مشاكلي الا انتي؟.
سلمى: ماشي يا سيدي, اضحك عليا اوي.
اقبل
عليهما ريهام وسامح يحمل كلا منهما وردة.
ريهام: ايه دا؟, انتو معاكو ورد انتو
كمان.
شادي: شفتي يا ستي, البت الغلسة ما سابتناش الا لما اشترينا منها.
وترك
الوردة على سقف السيارة وهو يركب, فالتقطتها سلمى وهي تركب, وقالت له
بلوم.
سلمى: وردتك يا استاذ, اوام نسيتني, وقال ايه انتي وشك في وشي طول
النهار.
شادي: اه,معلش,هاتي يابت الوردة, انتي الي نستيهالي عشان تغلطيني, دانا
هحطها في كتاب.
نظرت ريهام الى سلمى بتحذير وهي تقول بسخرية ذات مغزى.
ريهام:
دا ايه الحب دا كله؟.
فرد شادي ممازحا.
شادي: اه واخدين بعض عن حب.
فهمست
ريهام في اذن سلمى بغضب.
ريهام: اتلمي بقى يا مفضوحة.

الحلقه العشرين

لؤي: مش كنتي تقوليلي انتي
هتلبسي فستان لون ايه عشان اظبط التاي معاه.
نظرت نسمة للشاب الطويل المنحني عليها
في حفل زفاف قريبتها , وهي تقول بدهشة.
نسمة: ليه؟, على اساس اننا متجوزين مثلا!.
اندهش لؤي من جرأتها في الرد ,فقال.
لؤي: وليه لأ؟, مش يمكن ؟.
نسمة: يا بني اعقل بقى يا بني, انت عايز مني ايه؟.
لؤي: انتي مش عارفة انا عايز ايه؟.
نسمة: لا عارفة,الي انت بتقوله كل مرة تشوفني فيها, يا لؤي يا
بابا مينفعش الي في دماغك دا يحصل, انا مينفعش اصاحبك, افهمها بقى.
لؤي: بس انا بحبك يا نسمة.
نسمة: بيتهيألك, انت ما بتحبنيش ولا حاجة, انت بس موهوم صدقني.
لؤي: انتي هتعرفي الي جوايا اكتر مني؟.
نسمة: لا, انا اعرف انا اقدر اعمل ايه, والي مقدرش اعمله اني
ارتبط بيك بأي شكل من الاشكال في وضعنا دا, داحنا حتى في
وضع ميسمحش لينا اننا نفكر في حاجة زي كده اصلا, شوف
انت اد ايه وانا اد ايه, احنا عيال يابني.
لؤي: افهم من كده انك بتحبي حد تاني.
نسمة: ماهو انت كده تبقى مبتفهمش اصلا,
يعني انا اقلك ايه وانت تقولي ايه, يا بني افهم, انا مبصاحبش,
حلوة كده؟, فهمتها كده؟.
لؤي: اااه, انا بقى مش عاجبك عشان سني؟, ولا مش
عاجبك عشان ايه بالظبط؟.
قالت نسمة باستسلام.
نسمة: بص يا لؤي , انا مش هتناقش
معاك, عشان انت مش ناوي تفهم باين.
وانصرفت عنه في غضب.
لؤي: رايحة فين يا نسمة,......نسمة.
قالت هالة لنسمة التي اقبلت عليها تجلس بجانبها في حنق.
هالة: ايه؟, مالك؟.
نسمة: لؤي يا ستي, كان زانقني برة بيقولي بحبك كالعادة.
هالة: ههههههه,طب والله واد عسل,هيموت نفسه عليكي, انا مش عارفة
مش عايزاه ليه؟.
نسمة: هقولك ايه ,مانتي زيه.
هالة: والله انتي بس الي مكبرة الدنيا
اوي, مع ان عادي.
نسمة: يخرب بيت كلمة عادي دي, الي بتخلي الناس تعمل حاجات
غريبة وتقول عليها عادي.
**********************
سارت ندى بجانب شادي ويدها في يده, يتحدثان.
شادي: بس انتي شدي حيلك في الفيزيا اول باول, وانا مش هسيبك,
الي متفهميهوش, هساعدك فيه.
ندى: لا هي لذيذة لغاية دلوقتي.
شادي: برضة , ذاكريها من الاول عشان متتقلش عليكي.
ندى: لا بس المستر مش سايبنا ,من اولها
نازل امتحانات كده على طول.
شادي: كويس, عشان تتعودي.
وبينما هما يسيران,استوقفه صوت
فتاة صغيرة.
الفتاة: ورد يا بيه؟.
التفت ينظر اليها وهتف.
شادي: يخرب بيـــــتك, انتي مكتوبالي يا بت انتي.
هللت الفتاة في دهشة.
الفتاة: ايه داااا؟......مش انت يا بيه الي...؟؟؟,.... انت الي
كنت مستلف من البت؟,...بتاع الاسبوع الي فات؟.
شادي: ايوة الله يخرب دماغك, انتي طلعتيلي منين؟.
الفتاة: انت الي ماشي في مطرحي يابيه, دي منطقتي انا.
ضحكت ندى للحوار في دهشة.
ندى: ايه دا؟, انت عارفها يا شادي؟.
الفتاة: بس مش هي دي يا بيه المزة
الي كانت معاك المرة الي فاتت.
نظرت ندى الى شادي في استنكار وشك,فقال لها بسرعة
بلهجة عادية.
شادي: قصدها على سلمى.
الفتاة: الحقي يا ابلة كان بيقول عليها
اخته,الا هي اخته بجد يا ابلة؟.
نظرت اليها ندى بحذر, وهي تنقل بصرها بينه وبينها,فقال
شادي.
شادي: خدي يا بت وهاتي وردة واطلعي من دماغنا, لحسن مش هنخلص منك.
الفتاة: شفتي يا ابلة , اهو انا صدقت انه بيحبك, هيجيبلك وردة, المرة
الي فاتت مرضيش ابدا, مع ان البت كانت احلى منك
لامؤاخذة يعني.
شادي: اقطعي لسانك دا بقى واخرسي, ولا ما
خدش منك ورد.
الفتاة: لا يا بيه خد, وابقى تملي تعالى, هتلاقيني ملقحة هنا
على طول.
اخذ شادي الوردة وجذب ندى من امام الفتاة جذبا, وظلت
صامتة قليلا, فمد يده بالوردة.
شادي: احلى وردة لاحلى بنوتة في الدنيا,....مالك؟.
ندى: ممم, انت بقى بتعد تتمشى مع سلمى.
شادي: وايه المشكلة؟.
ندى: قولي انت ايه المشكلة.
شادي: مفيش مشكلة طبعا, انتي مجنونة يا بنتي
هتتضايقي من سلمى, دي زي اختي, لا اختي ايه؟, دي زي اخويا كمان.
ندى: وانت بقى بتتمشي ليه مع
اختك, زي ما بتتمشى معايا؟.
شادي: ياعبيطة دا يوم ما خرجت معاهم, يوم امتحان السواقة, وكنا
سايبين سامح وريهام لوحدهم شوية ورانا, بس, انتي هبلة
يا ندى؟, هتغيري عليا من اصحابي.
ندى: واغير عليك من اخواتي كمان, انت متعرفش
انا بحبك اد ايه ولا ايه؟.
شادي: يا بنتي الي في دماغك دا اسمه هبل, انا بحبك
اكتر ما انتي بتحبيني اصلا.
ندى: بس انت مبتغيرش عليا.
شادي: دا عشان واثق فيكي.
ندى: لا دا عشان انا مبعملش حاجات تخليك تشك فيا, وانت ماشاء الله
مش مخليني ليا اصحاب ولا حتى اصحاب بنات, عشان كده
مطمن, لكن انا اصحابك مشاركني فيك, كأنهم
متجوزينك عليا,لا ومش اصحابك وبس,ومذاكرتك كمان,وشوية مامتك
وشوية مزاجك الي كل شوية بحال.
اكفهر وجه شادي في ضيق وقال بضيق.
شادي: اتخانقي, اتخانقي ياندى
اتخانقي, اصل احنا بقالنا مدة كويسين متخانقناش وانتي عايزة تتخانقي.
ندى: انت بتتريأ عليا كمان؟, ربنا يسامحك.
شادي: يلا يا ندى نروح, احنا كنا مروحين اصلا,
يلا يا بنتي لحسن احنا مبقيناش نعرف نتكلم خلاص من غير نكد.
قالت ندى بعصبية.
ندى: احسن برضة, انت مبقتش تطيقلي كلمة اصلا.
*******************
ردت والدة ندى على الهاتف في هدوء.
الام: الو,..... اه اهلا ازيك يا شادي يا حبيبي, عامل ايه؟ ,....واخبار مامتك
ايه؟,....الحمد لله,....ندى, موجودة,.... انتو زعلانين ولا ايه يا حبيبي؟,......ممم,....يا
شادي يابابا بالراحة عليها شوية, انت عارف ان ندى بنتي
حساسة شوية, ....منا عارفة انك معملتش حاجة, ....حاضر, ...حاضر...طب استنى
هاندهالك.
وقامت لتنادي ندى من غرفتها.
الام: قومي كلمي شادي.
تململت ندى بضيق.
ندى: مش عايزة.
الام: قومي يا بنت بلاش هبل, قافلة موبايلك ليه؟, هو قالي
على كل الي حصل ,والموضوع مش مستاهل غبائك دا كله.
ندى: يا ماما انتي مش فاهمة حاجة , اصحابه
دول انا مبقتش اطيقهم خلاص.
الام: بس بطلي نرفزة وقومي , الولد على التليفون, عيب.
قامت ندى مضطرة وهي تأفف.
ندى: يووووووووووووه.
قالت الام وندى تمر من امامها.
الام: واتصالحو بقى, بطلي هبل.
قالت نسمة باستنكار ساخر.
نسمة: يــــــا حلاوة.
فالتفتت اليها الام بعصبية.
الام: فيه ايه يا بنت؟.
نسمة: هو بقى فيه حاجة؟, ماخلاص, معادش فيه حاجة,
ماكنتي تعزميه يتغدا عندنا احسن.
الام: خليكي في نفسك يا ست نسمة, بكرة نشوفك.
نسمة: يارب مايجي بكرة دا, ولا تشوفوني في موقف زي دا ابدا.
والتفتت الام لهالة العاقدة
حاجبيها في غضب.
الام: وانتي مالك انتي كمان.
هالة: مفيش.
الام: مال اختك يا نسمة؟.
قهقهت نسمة قبل ان تقول في تهكم.
نسمة: هههههه, اصل عمرو مش عايز يخطب السنة الجاية, بيقلها نستنى
شوية لما يستلم الشقة,.... هههه بيخلع من قبل ما ييجي
اصلا.,عايز يتعرف عليها الاول اصله لسه معرفهاش.
صاحت بها نسمة.
هالة: احترمي نفسك يا حمارة انتي, وقومي ذاكري يا ادبي.
نسمة: انا هقوم خالص, بدل ما اتشل م الي بيحصل حواليا دا كله.
وبعد ذهابها قالت الام
لهالة.
الام: متخافيش يا حبيبتي , انا ومامته اتفقنا خلاص, اول ما يخلص
هيجي, دا مش بمزاجه, دا غصب عنه, وبعدين شقة ايه وبتاع
ايه, ما تستنو الشقة تيجي براحتها وانتو مخطوبين.
هالة: انا مبقتش عارفاله يا ماما, دا بقى مجنون.
الام: معلش يا حبيبتي, بكرة يعقل,كلهم بيبقو كده, الشباب كلهم
طايشين
, ولو على حكاية الخطوبة, مش عايزاكي تقلقي, احنا متفقين على كل
حاجة,
متخافيش خالص.
هالة: يارب يا ماما ’يارب يعقل بقى عشان انا زهقت.
***************
سلمى: انا خلاص هتجنن يا ريهام, ندى ندى ندى, على طول بيحكي
على ندى, مبيخلصش, انا زهقت.
ريهام: مانا قلتلك ابعدي عنه احسن,انتي الي مصممة
تعملي فيها مديحة يسري ,وعايشة فيها الدور.
سلمى: يا بنتي والله العظيم حاولت مش قادرة, اعمل ايه؟, انا بقيت
زي ما بيقول مبقدرش اعدي يوم من غير ما اشوفه, جوه
الكلية بشوفه, برة الكلية بشوفه, في البيت على
طول بنتكلم في التليفون, وكل دا هو بيتعامل عادي, ومش حاسس
بيا اصلا.
ريهام: بصي بقى, انا نصحتك والي انتي عايزاه
اعمليه, هتخسري ايه يعني, عرفيه انك بتحبيه.
سلمى: لا طبعا, لانه هيقولي احنا
اخوات وساعتها هخسره هو.
ريهام: وهو انتي كده كسباه يعني؟.
سلمى: لا , بس على الاقل انا لسه معاه.
ريهام: ربنا يشفيكي.
******************
سامح: بص اديني قلتلك وانت حر يا معلم.
سادي: ايه يا ابني , لأ طبعا, انت بس الي مجنون,
لا طبعا,...سلمى؟؟,...طب ازاي؟.
سامح: والله يا بني شكلها واقعة فيك بجد.
شادي: يا موحا دا بس عشان احنا قريبين اوي من بعض ,فالناس بتحس
كده.
قال سامح بلهجة غير مقتنعة.
سامح: يمكن.....
وصمتا قليلا, فقال شادي في توتر.
شادي: انت هتشكك امي ليه؟, يخرب بيت دماغك يا سامح.
سامح: انا مش متأكد بس انا حسيت كده, قلت
اقلك, وانت اتصرف, شوف انت بطريقتك.
شادي: لا لالا لالا, ولا عايز اشوف اصلا, حتى لو هي كده فعلا, مش
عايز اعرف.
سامح: يا سلام.
شادي: اه يا ابني انت اهبل, لو طلع فعلا فيه حاجة, هيبقى موضوع
محرج جدا, وانا بعز البنت دي فعلا ومش عايز اخسرها, لا
انسى , مفيش حاجة اصلا, صح, مفيش حاجة , انت بس بيتهيألك.
سامح: ممكن.
وصمتا ثانية, قبل ان يعود شادي للحديث وكأنه يكلم نفسه.
شادي: سلمى؟؟؟,..لا لا لا لا لا , مينفعش اصلا.
سامح: الله , ماتسكت بقى, خلاص يا سيدي انا
غلطان, مفيش حاجة , انا الي اعمى,نقطنا بسكاتك بقى.
قال شادي في اكبار.
شادي: طبعا هسكت وهنسى كمان الي انت قلته, قال سلمى معجبة بيك قال,....سلمى؟.

الحلقه الواحد والعشرين

ندى: ماهي سلمى كلمتني امبارح تسأل على امتحان العربي.
شادي: بجد؟, البنت دي جدعة اوي والله, ابقى اسألي عليها برضة يا ندى, عشان كانت عيانة.
ندى: منا عارفة , ماهي كلمتني بقلك, بس هي خفت دلوقتي.
شادي: لا عيب برضه , ابقى اسألي عليها.
ندى: حاضر.
شادي: اهي البنت دي غريبة جدا, طيبة اوي, وجدعة ولا الرجالة, وسبحان الله, عمري ما شفتها مع ولد, شخصية محترمة جدا, مع انها جميلة ودمها خفيف.
ندى: ولما هي جميلة ولذيذة وظريفة اوي كده, مارتبطتش ليه لغاية دلوقتي؟.
شادي: منا بقلك محترمة.
ندى: ممم, يعني انا مش محترمة؟.
شادي: انتي هترجعي تاني تحطي سلمى في دماغك, احنا مش كنا خلصنا, انا مش عارف انتي شاغلة دماغك بيها ليه؟.
ندى: وانا اشغل دماغي بيها ليه؟.
شادي: منا مش عارف, يمكن عشان ريهام مصاحبة سامح وهي الي فاضية, وانتي بقى مستلماها اشتغالتك.
ندى: بصراحة ,انت علاقتك بالبنت دي اوفر يا شادي , مش معقول, دي بقت صاحبتك اكتر من سامح, دي بتشوفك اكتر مني.
شادي: طبيعي يابنتي احنا في كلية سوا,بصي يا ندى, مش انتي الي هتحددي علاقتي باصحابي تبقى عاملة ازاي, انا بدأت اتخنق.
ندى: تتخنق مني؟.
شادي: من اسلوبك الشكاك دا على طول, وغيرتك الي ملهاش أي مبرر, يعني احنا بقالنا سنتين مع بعض اهه, انا عمري ما شفتك كده, بطلي غيرة وخليكي واثقة في نفسك اكتر من كده.
ندى: لا انا واثقة من نفسي أوي كمان.
شادي: مش باين.
ندى: خلاص يا شادي , انا مش عايزة وجع دماغ ايام الامتحانات, انا مش هكلمك في الموضوع دا تاني, بس انت متحطش في دماغك اني بغير عليك ومخنقة عليك.
شادي: حاضر يا نودي.
ندى: انا هقفل دلوقتي عشان ادخل اذاكر, ادعيلي يا شيدو بكرة اوي.
شادي: متخافيش يا حبي, الي تخافي منه ميجيش احسن منه.
ندى: ربنا يستر.
شادي: ان شاء الله يستر.
*******************
سارعت هالة بخطواتها شبه راكضة وهايدي تحاول اللحاق بها في سرعة.
هايدي: انتي يا بنتي استني, اكيد مش هو.
دفعت هالة يد هايدي التي مدتها محاولة ايقافها , وهي تسير بسرعة وتقول بغضب عارم.
هالة: لا هو, هو انا هتوه عن عربيته يا هايدي؟.
هايدي: طيب انتي بتجري ليه؟, يعني كده هتلحقيه؟.
هالة: ايوة هلحقه.
وانطلقت راكضة بالفعل متوجهة للمكان الذي ظنت اختفاء سيارة عمرو به, وهايدي تتبعها في ضيق, حتى توقفت تنظر في غضب, فتوقفت خلفها هايدي.
هالة: عشان لما اقلك انه هو, تصدقيني.
نظرت هايدي حيث تنظر هالة, فرأت عمرو موقفا سيارته , مترجلا منها, بينما فتاة تترجل من الجانب الاخر,فهاجت هالة.
هالة: دا انا هقتله.
واندفعت في ثورة,تهتف.
هالة: عــــمــــرو.
انتفض عمرو ذعرا حين رآها تقبل عليه كالاعصار, حتى توقفت امام السيارة تصيح.
هالة: مين دي يا عمرو؟.
عمرو: دييي....دييييي.
هالة: انت هتهته؟, انطق قولي مين دي؟, قريبة مين المرة دي؟.
عمرو: اهدي بس انتي مش فاهمة,...هتفهمي,...اهدي...
.ددديييي....دييي.
هالة: دانت مش عارف حتى تألف كدبة.
خرجت الفتاة من السيارة ببطء وهي تنظر اليهما في دهشة,ونظرت الى هالة بمزيج من الخوف والازدرداء.
الفتاة: مين دي يا عمرو؟.
هالة: انا الي عايزة اعرف انتي مين, قوليلي انتي مادام هو مش عارف يتكلم.
الفتاة: عمرو..., هي بتتكلم كده ليه؟.
هالة: كلميني انا هنا , وانتي بقى جابك من تحت انهي داهية؟.
هتفت الفتاة باستنكار.
الفتاة: احترمي نفسك, ماتقول حاجة يا عمرو.
قال عمرو بذعر.
عمرو: اهدي يا هالة.
هالة: اهدا؟؟؟,دانا هسود يومكو النهاردة, انا قلتلك يا عمرو قبل كده ان مسيري هقفشك بنفسي, بس ساعتها مش هتشوفني تاني.
عمرو: هالة ,استني افهمك.
هالة: انا مش عايزة افهم, ما كل حاجة باينة خلاص, هفهم ايه بقى؟,هتبقة قريبة مين المرة دي, اصلك بتخلص الكلية وبتشتغل شوفير خميس وجمعة لقرايب اصحابك.
عمرو: لا يا هالة ديييي,....افهمك بس,رايحة فين,... متمشيش وانتي كده ,..استني.
هالة: ليه؟, عشان اكمل معاكو السهرة, لا وعلى ايه؟, اتفضلو انتو كملو,مش هعطلكو, بس بجد يا عمرو, انا مش عايزة اشوفك تاني ابدا, عشان انت فعلا طلعت واطي ومعندكش دم زي كان الكل بيقولو عنك, وخاين وزبالة,وانا مش طايقة حتى ابص في وشك.
وجذبت هايدي وهي توقف تاكسيا بعصبية, بينما تسمر عمرو في مكانه لا يدري ماذا عساه يفعل, وهو ينظر اليها بعجز.
*********************
نسمة: هتفضلي متنحة كده كتير وحاطة ايدك على خدك,خلاص ركزي,انتي عندك امتحان بكرة.
ردت هالة وهي لاتزال شاردة.
هالة: انا مش متنحة.
نظرت اليها بحزن وقالت.
نسمة: ياشيخة؟, دانتي مقلبتيش الصفحة بقالك نص ساعة,......ماخلاص بقى يا لولو, انتي المفروض تحمدي ربنا مش تزعلي, يعني اهو ربنا بينهولك من قبل ما تتورطي معاه في خطوبة وجواز, انتي كنتي عارفة من الاول انه مينفعش بس كنتي بتكابري, فربنا حب يوريهولك بعنيكي, عشان متقدريش تطنشي زي ما كنتي بتعملي كل مرة.
ردت هالة بنغمة غير مبالية شاردة, ولم ترفع عينيها عن الكتاب.
هالة: مممممم.
نسمة: انا عارفة ان قلبك مكسور, بس والله ما يستاهل منك انك تضيعي مستقبلك علشانه.
هالة: حاضر يا نسمة بقى, قومي انتي ذاكري ملكيش دعوة.
نسمة: ماليش دعوة ازاي يعني؟, انا مش هعرف اذاكر وانتي عاملة كده.
هالة: لا متخافيش عليا, قومي انتي بس شوفي نفسك, وانا هذاكر متخافيش.
قبلتها نسمة على جبهتها وهي تدعو لها ثم انصرفت, فالتفتت ندى عن مكتبها تنظر لهالة التي عادت لشرودها في اسف , فقالت وهي تتوجه اليها.
ندى: هالة, انتي لسه معيطتيش؟.
هالة: واعيط ليه؟.
ندى: يعني,....انتي اكيد مخنوقة يعني.
زفرت هالة وهي تقول بضيق.
هالة: انا نفسي تريحو نفسكو وتريحوني بقى, انا زعلانة طبعا وبموت, ومش قادرة اذاكر طبعا, فمتبقوش عاملين زي الي واحد متعور في وشه والناس رايحة جاية تقوله على فكرة انت متعور على اساس انه مش عارف, طب منا عارفة اني زعلانة واني لازم اذاكر واني لازم اركز عشان عندي امتحانات وانسى عمرو, بس انا مش قادرة لا اعمل دا ولا دا, فسيبوني في حالي ربنا يخليكو عشان انا بجد تعبانة.
ندى: خلاص يا هالة, هنسيبك في حالك.
**********************
سلمى: وهي النتيجة بتاعتها هتطلع امتى؟.
شادي: والله لسه مش عارف, بس لما بتطلع يعني بتبقى الدنيا مقلوبة على النت, هبقى ادور معاها زي السنة الي فاتت.
سلمى: ابقى جيبلي رقم جلوسها برضه عشان ابقى اجيبهلها وانا بدور لولاد خالتي.
شادي: ان شاء الله.
سلمى: صحيح هي هالة عملت ايه في النتيجة؟.
رد بأسف.
شادي: شالت مادة بس الحمد لله انها نجحت اصلا,البت دي السنة دي كانت ملطشة معاها اوي.
قالت ساخرة.
سلمى: مش معاها لوحدها, فيه واحد صاحبنا كان هيضيع السنة دي ومش هيطلع الاول,لولا ربنا ستر.
شادي: اههه , متفكرنيش, البنت الي اسمها منى دي, انا مش عارف جاتلي منين, الناس المحولة من جامعات تانية دول بيبقو خطر, الواحد مبيبقاش عارف قدراتهم الا بعد الامتحانات.
سلمى: بس انت عديتها على الحروكروك, بينكو بتاع نص درجة في المية.
شادي: الحمد لله, اصل هي عندها مشكلة شوية مع النظري, بس يخرب بيت دماغها في العملي, انتي مبتشوفيش يا بنتي مشاريعها, دي جبارة, مش ممكن ,كرييتف بشكل رهيب.
سلمى: انت معجب ولا ايه؟.
رد بسرعة.
شادي: معجب مين؟, دي شبة سامي العدل, بقولك شغلها شغلها.
كتمت ضحكتها وهي تنهره.
سلمى: بس يا شادي متتريأش على البنت.
شادي: يا شيخة هي دي بنت, بقى شبهه ولا مش شبهه؟.
ضحكت وهي تقول.
سلمى: عيب يا شادي اتلم.
شادي: حاضر هتلم.
سلمى: ان شاء الله يا شادي انت ربنا هيكرمك دايما ,عشان انت تستاهل كل خير, انا دايما بدعيلك والله العظيم.
شادي: ولله انتي الي تستاهلي كل خير يا سلمى , انا مش عارف انتي ازاي كده عايشة ومحدش بيخطبك ولا بيتجوزك, انا مش فاهم الصبيان دول اتعمو ولا ايه؟.
نظرت اليه في حسرة وهي تقول.
سلمى: باين....قصدي, انا مبفكرش في حاجة دلوقتي, احنا في هندسة يا بني, يعني يا نذاكر يا نحب.
شادي: منا بذاكر وبحب اهه والحمد لله, ماشي تمام, انا بس بستغرب, انتي ازاي محدش واخد باله منك كده, اصل انتي بجد ,زي مابيقولو كده جوهرة, يا بخت الولد الي هتحبيه بجد.
سلمى: .............
شادي: ساكتة ليه؟.
سلمى: عادي.
شادي: انتي مش مصدقاني؟, طب والله انتي بنت اجدع من أي بنت, ربنا اكيد شايلك خير كتير اوي, انا شخصيا لو مكنتش بحب ندى كان زمانك اول واحدة افكر فيها.
شعرت ندى باختلاج قلبها مع حديثة,فقالت باضطراب.
سلمى: شكرا.
شادي: طب ايه رأيك بقى انا مش هستريح الا لما اجوزك, انا الي هجيبلك عريس, لو كان الواد هاني اخويا دا كبير كنت جوزتهولك.
توترت سلمى اكثر ,فنهرته بعصبية.
سلمى: بس بقى يا شادي, بطل كلام غبي, خلينا في الي احنا فيه, هتعمل ايه في الهدية الي انت كنت عايز تجيبها لندى؟, مقلتليش اجيبهالك منين؟